ஒரு சிறுவன், தன் தாய் மீன் வறுப்பதை ஆர்வத்துடன் பார்த்துக் கொண்டிருந்தான். முதலில் மீனின் தலைப் பகுதியை வெட்டிய தாய், பிறகு மீனின் வால் பகுதியை வெட்டினார். பிறகு மீனின் தலை, வால், உடல், ஆகிய மூன்றையும் தனித் தனியாக வாணலியில் போட்டு வறுத்தார்.  அதைப் பார்த்த மகன், ‘ஏன் தலையையும் வாலையும் தனித் தனியாக வெட்டி வறுகிறாய்? முழு மீனையும் அப்படியே வறுத்தால் என்ன?’ என்று தன் தாயிடம் கேட்டான். 

சிறிது யோசித்த தாய் சொன்னாள் “நீண்ட காலமாக நான் இப்படித்தான் சமைத்து வருகிறேன் என் அம்மா எனக்கு இப்படித்தான் கற்றுக் கொடுத்தார்.” 

இந்தப் பதிலில் மன நிறைவு அடையாத மகன், பாட்டியிடம் சென்று இதே கேள்வியைக் கேட்டான். பாட்டியும், “எனக்கு காரணம் தெரியவில்லை. என் அம்மாவும் அப்படித்தான் கற்றுத் தந்தார்” என்று கிரைப் வாட்டர் விளம்பர பாணியில் பதில் சொன்னார். 

தன் கொள்ளுப்பாட்டியிடம் சென்று இதே கேள்வியைக் கேட்டான். நீண்ட யோசனைக்குப் பிறகு அம்மூதாட்டி காரணத்தை நினைவு கூர்ந்து சொன்னார். ‘அப்போது எங்கள் வீட்டில் மீனை வறுக்க சிறிய வாணலி தான் இருந்தது. மொத்த மீனையும் ஒரே தவணையில் வறுக்க முடியாது என்பதால் அப்படி சமைத்தோம்’ என்றார். 

இக்கதையில் வரும் வாணலி போன்றுதான் நம் செலவினங்களும். காலங்காலமாக ஒரு செலவு செய்யப்பட்டு வருகிறது என்றால், அதன் காரணத்தை யாரும் அலசி ஆராய்ந்து பார்ப்பதில்லை. ஏதோ ஒரு தேவைக்காக செய்யப்படும் செலவுகள், அத்தேவை நிறைவடைந்த பிறகும், காரணமில்லாமல் காலங்காலமாக தொடர்வதை நாம் பல நிறுவனங்களில் காணலாம். 

ஏர்லைன்ஸ் நிறுவனம் வெற்றி பெற்ற  கதை. 

விமானப் போக்குவரத்து நடத்தும் தொழில் என்பது ஆடம்பரச் செலவுகள் அதிகம் மிகுந்த தொழிலாகும். இந்தத் துறையில் ஆடம்பரச் செலவுகளையெல்லாம் அறவே தவிர்த்துவிட்டு விமானப் போக்குவரத்தை வெற்றிகரமாக நடத்த முடியும் என்று காட்டியது, அமெரிக்காவைச் சேர்ந்த ஒரு ஏர்லைன்ஸ் நிறுவனம் இந்நிறுவனத்தின் கதை இன்றளவும் நிர்வாகவியல்  மாணவர்களுக்கு ஒரு முன்மாதிரி பாடம் ( Case Study) ஆகும். 

அப்படி என்ன சிக்கன நடவடிக்கைகளை நிறுவனம் மேற்கொண்டது..? 

• விலை உயர்ந்த விமானங்களை வாங்குவதற்கு பதிலாக பழைய விமானங்களை குறைந்த விலைக்கு வாங்கியது. 

• பெரிய விமானங்களை வாங்கி குறைவான ட்ரிப் அடிப்பதற்கு மாற்றாக சிறிய விமானங்களை வாங்கி அதிக ட்ரிப் அடிக்க திட்டமிட்டது. 
• பெரிய நகரங்களை மட்டும் கணக்கில் கொள்ளாமல், சிறிய நகரங்களுக்கும் விமானச் சேவையை விரிவுபடுத்தியது. 
• சிறிய விமானங்கள்  நிற்பதற்கு விமான நிலையங்களில் குறைந்த இடமே தேவைப்பட்டது. அதனால் விமான நிலையத்துக்கான வாடகை குறைந்தது. 
• சிறிய விமானத்தில் சேவை செய்வது, சுத்தம் செய்வது என அனைத்திற்கும் குறைந்த நேரமே செலவானது. பணியாளர்களும் குறைவாகவே தேவைப்பட்டனர். 
• முதல் வகுப்பு இருக்கைகளை அறவே நீக்கிவிட்டு இரண்டாம் வகுப்பு இருக்கைகளை மட்டுமே விமானம் முழுவதும் அமைத்தது. மேலும், இருக்கை எண் ஏதுமில்லாமல், ‘முதலில் வருபவர்களுக்கு முன்னுரிமை’ என்ற அடிப்படையில் பயணிகள் அமர வைக்கப்பட்டனர். இதனால், பயணிகள் இருக்கைகளைத் தேடி அலையும் நேரம் குறைந்தது. 

• பொதுவாக விமானங்களில் பயணிகளுக்கு வழங்கப்படும் இலவச உணவு, தேநீர் போன்றவை நிறுத்தப்பட்டு செலவுகள் குறைக்கப்பட்டன. அதற்கு பதில் கட்டணம் செலுத்தி உணவு பெற்றுக்கொள்ளும் வசதி அறிமுகப்படுத்தப்பட்டது. 
• ஒரு விமானத்தில் இருந்து மற்றொரு விமானத்திற்கு சரக்குகளை மாற்றுதல் அல்லது பயணிகள் மாறுதல் போன்றவை  தொடர்பான சேவைகள் நீக்கப்பட்டன. 
• இதனால் இந்நிறுவன விமானங்கள், விமான நிலையத்தில் காத்திருக்கும் நேரம் குறைந்தது. அந்த நேரத்தில் கூடுதல் ட்ரிப் அடிப்பது சாத்தியமானது. 

நிறுவனத்தில் குறைந்த பணியாளர்களை வைத்துக்கொண்டு கூடுதல் நேரம் பணியாற்றும் வகையில் யூனியனுடன் பேசி ஒப்பந்தத்தை இந்நிறுவனம் மாற்றி அமைத்தது. அவர்களுக்கு வருமானத்தையும் அதிகரித்தது. மேலும் நிறுவனத்தின் பங்குகளில் பணியாளர்களும் முதலீடு செய்ய வாய்ப்பளித்து, அவர்களை பங்குதாரர்களாகவும் ஆக்கிக் கொண்டது. இதனால், பணியாளர்கள் வேலை தாவுவது குறைந்தது. புதிய பணியாட்களைத் தேடி செலவழிப்பதும் குறைந்தது. 

இப்படியாக, பெரும் தொகை மிச்சமாக, வாடிக்கையாளர்களுக்கு குறைவான கட்டணத்தில் சேவை வழங்கி, வருமானத்தை அதிகரித்து வெற்றி பெற்றது. 

 ‘புகைவண்டியில் பயணம் செய்வோரின் எண்ணிக்கைதான் உலகில் மிக அதிகம். அவர்களை விமானத்தில் பயணம் செய்ய வைப்பதே எங்களது நோக்கம்’ என்று அந்த நிறுவனத்தின் தலைவர் கூறியது நினைவு கூறத்தக்கது. அமெரிக்காவில் அந்த வெற்றியை பின்பற்றி, பல விமான நிறுவனங்கள் தற்போது ஆகாயத்தில் சிக்கனமாக சிறகு விரிக்கத் தொடங்கிவிட்டன. 

                                                                                              ————  இராம்குமார் சிங்காரம். Tamil motivational speaker