பணக்காரர்களின் பலம் என்னவென்றால், அவர்கள் சின்ன விஷயங்களைக்கூட நுணுக்கமாகத் திட்டமிடுவதுதான். 

• வியாபார நிமித்தமாக ஒருவரை சந்திக்க வேண்டுமென்றால், அவரை மதிய உணவிற்கு வெளியில் அழைத்துச் செல்கிறார்கள். அப்படி அழைத்துச் செல்வதால், அவரோடு பேசுவதற்கு நிறைய நேரம் இவர்களுக்குக் கிடைக்கிறது.  

• மீட்டிங்கிற்கு முன்பு அந்த சந்திப்பை ஒரு முறைக்கு இரு முறை உறுதிப்படுத்தி, அந்த மீட்டிங்கின் முக்கியத்துவத்தை அவர்கள் உணரச் செய்கிறார்கள். 

• உரிய நேரத்திற்கு முன்னரே சென்று அவருக்காகக் காத்திருக்கிறார்கள். 

• உணவகத்தில், இவர்கள் சுவருக்கு அருகில் அமர்ந்து கொண்டு வெளிப்புறம் பார்த்தவாறும், மற்றவரை தமக்கு எதிரில் அமரச் செய்து அவரது கவனம் முழுவதும் இவர் மீது மட்டுமே இருக்குமாறும் பார்த்துக் கொள்கிறார்கள். 

• மீட்டிங்கின்போது அவருக்கும், தமக்கும் தெரிந்த பொதுவான நபர்கள் பற்றி எடுத்துச் சொல்லி, அவரிடையே நெருக்கத்தை உண்டாக்கிக் கொள்கிறார்கள்.  

• தாம் குறைவாக சாப்பிட்டுவிட்டு, மீதி நேரத்தில் நிறைய பேசுகிறார்கள். 

• வியாபாரத்தைப் பற்றி அதிகம் பேசாமல், நட்பை வளர்ப்பதிலேயே குறியாக இருக்கிறார்கள். 

• இடையிடையே அவரிடம் காணும் நல்ல விஷயங்களையும் பாராட்டுகிறார்கள்.  

• மீட்டிங் முடிந்து அலுவலகம் சென்றவுடன், அவருக்கு மின்னஞ்சலில் நன்றி கடிதம் அனுப்பி, நட்பை தொடர்ந்து தக்க வைத்துக் கொள்கிறார்கள். 

• அதற்குப் பிறகு சில நாட்கள் கழித்து வர்த்தகம் பேசத் தொடங்குகிறார்கள். 

இப்படி பணக்காரர்கள் சிறிய விஷயத்தைக் கூட நுணுக்கமாகச் செய்வதால், அவர்களுக்கு வெற்றி கிட்டுகிறது. ஆனால் நாமோ பெரிய விஷயத்தைக்கூட மேலோட்டமாகச் செய்துவிட்டு ‘வரட்டும்; பார்த்துக் கொள்ளலாம்‘ என்று மெத்தனமாய் இருந்து விடுகிறோம்.  

காய்கறி வியாபாரிகள் பலரும் வாகனங்களை எடுத்துக் கொண்டு, ஊர் ஊராகச் சென்று உருளைக்கிழங்கை கொள்முதல் செய்து, சந்தைக்கு கொண்டு வந்து தரம் பிரித்து விற்பது வழக்கம். 

எல்லா வியாபாரிகளும் கொள்முதல் செய்ய நாள்தோறும் ஒரே நேரத்தில் வெவ்வேறு வாகனங்களில் கிளம்பினாலும் கூட, ஒரேயொரு வியாபாரி மட்டும் சந்தைக்கு வந்து முதலில் விற்பனை செய்து விடுவார். 

இவரால் மட்டும் இது எப்படி முடிந்தது?   

அதற்கு இவர் பின்பற்றிய ஒரு நுணுக்கம்தான் காரணம். 

வியாபாரிகளெல்லாம் உருளைக்கிழங்கை கொள்முதல் செய்துவிட்டு, சந்தைக்கு வந்து அளவு வாரியாக தரம் பிரிப்பர். இப்படி தரம் பிரிக்க ஒரு மணி நேரமாவது ஆகும். 

இதற்கு மாறாக, இவர் மட்டும் பள்ளம், மேடான பாதையில் வாகனத்தை ஓட்டி வந்து சந்தையில் நிறுத்துவார். அந்தப் பாதையில் பயணிக்கும்போது வண்டி குலுங்கிக்கொண்டே வருவதால், சிறிய உருளைக்கிழங்குகள் அடிப்பகுதிக்கும், பெரிய உருளைக்கிழங்குகள் 

மேற்பகுதிக்கும், நடுத்தர அளவுள்ள உருளைக்கிழங்குகள் நடுவிலும் நின்றுவிடும். எனவே, சந்தைக்கு வந்ததும் அப்படியே அளவுவாரியாக எடுத்து, முதல் ஆளாக விற்று லாபம் ஈட்டி விடுவார். 

இப்படி நுட்பமான திட்டமிடல்தான் பணக்காரர்களை வித்தியாசப் படுத்தி காண்பிக்கிறது. 

 –ராம்குமார் சிங்காரம், Motivational Speaker in Tamil Nadu